Din nasihatdir!

Nasihat dinimiz bilan chambarchas bog‘liq fazilatdir. Hatto ba’zi ulamolar nasihat dining to‘rtdan birini tashkil qiladi, deganlar. Xullas Islom tanqiddan ko‘ra nasihatni afzal ko‘radi, tanqidchilardan ko‘ra nasihatchilar tarafini oladi! Tanqidga nisbatan nasihat yaxshi natija berishi ziyoliga ham omi savodsizga ham kundek ravshan, hujjat talab qilmas haqiqatdir!

Dinimizda musulmonlar bir birlarini nasihat bilan isloh qilishga targ‘ib etiladi. Alloh taolo Qur’oni karimda aytadi:

أُبَلِّغُكُمْ رِسَالاتِ رَبِّي وَأَنَاْ لَكُمْ نَاصِحٌ أَمِينٌ
"Sizlarga Robbimning yuborganlarini yetkazaman va men sizlarga ishonchli nasihatgo‘yman" (A’rof surasi  68-oyat).
Janob Payg‘ambarimiz Muhammad sollallohu alayhi va sallam aytganlar:

وَعَنْ تَمِيمٍ الدَّارِيِّ رَضِيَ اللهُ عَنْهُ أنَّ النَّبِيَّ صلى الله عليه وسلم قال: الدِّينُ النَّصِيحَةُ. قُلنَا: لِمَنْ؟ قال:لله وَلِكِتَابِهِ وَلِرَسُولِهِ وَلأئِمَّةِ المُسْلِمِينَ 
وَعَامَّتِهِمْ
Tamim ad-Doriy roziyallohudan rivoyat qilindi: Rasululloh sollallohu alayhi va sallam aytdilar: "Din—bu nasihatdir! Biz: kim uchun?—dedik. Ul zot: Alloh uchun, kitobi uchun, rasuli uchun, musulmonlarning boshliqlari va ommasi uchun", — dedilar (Sahihi Muslim).

وَإِذْ قَالَ لُقْمَانُ لِابْنِهِ وَهُوَ يَعِظُهُ ...

“Luqmon o‘g‘liga pand-nasihat qilib aytganlarini eslang...”. 
(Luqmon surasi, 13 oyat)

Nasihat bir kishiga (ya’ni o‘g‘illariga) qaratilgan edi. Lekin o‘sha va’zdagi ixlos va rostgo‘ylik (sababidan u zotning so‘zi Qur’onga kiritildi va oqibatda) milliardlab insonlarga ushbu nasihat yetib bordi.
Siz ham va’z qilganda butun olamga so‘zlayotgandek holatda bo‘ling.

Ali ibn Abu Tolib roziyallohu anhu aytdilar:
Dunyodagi zohidlar shunday kimsalarki, va’z nasihat qilinsa nasihatni qabul etib, ibrat oladilar, ishonadilar hamda amal qiladilar. Agar farovonlik yetsa, shukr qiladilar. Agar mashaqqat yetsa, sabr qiladilar.

Latif nasihat

Bir kishi Ibn Muborakning majlislarida aksa urib, alhamdulillah, demadi. Ibn Muborak: “Aksa urgan kishi nima deb aytardi?” deb undan so‘ragandilar, u kishi: “Alhamdulillah, deydi”, dedi. Shunda u zot: “Yarhamukalloh”, deb javob aytdilar.

Hidoya oʻrta maxsus islom bilim yuti 46-guruh talabasi Abdulhamidov Saidali tayyorladi.