Рамазон – улуғ неъмат
Муборак Рамазон ойи Аллоҳ таолонинг мўмин бандаларига берган улуғ неъматидир. Аммо биз бу ойнинг ҳақиқатию қадрини жуда кам биламиз. Чунки, эртаю кеч ўзимизнинг дунёвий ишларимизга ўралашиб юрамиз, саҳардан то шомгача айни дунёнинг юмушлари ила машғулмиз, моддият гирдобига мубталомиз. Аммо Рамазон нима ўзи, биламизми? Аллоҳ таоло фазли ила мушарраф айлаган ва бу муборак ойда У зотнинг анвору баракотлари тўлиб-тошишини биладиган зотларгина бу ойнинг қадрини билади. Сиз ушбу ҳадисни эшитган бўлсангиз керак, Набий соллаллоҳу алайҳи васаллам Ражаб ойини кўрганларида:
«Эй Аллоҳим! Бизга Ражаб ва Шаъбонда барака ато қил ва бизни Рамазонга етказ», деб дуо қилар эдилар (“Мажмаъуз завоид”).
Яъни, умримизни шунчалик узун қилгинки, бизга Рамазон ойига етишиш насиб бўлсин.
Энди, тасаввур қилинг, Рамазон келишидан икки ой олдин уни кутиш иштиёқи бошланяпти ҳамда Аллоҳ таолодан бу ойга етказишини сўраб дуо қиляптилар. Бу ишни фақатгина муборак Рамазоннинг ҳақиқий қадр-қимматини билган кимсагина қила олади.
Иншааллоҳ, бир неча кундан кейин муборак Рамазон ойи кириб келади. Бу ойнинг улуғлигини билмаган, баракасини англамаган бирор мусулмон йўқ. Аллоҳ таоло бу ойни ибодатга хослади. Бу ойда бандаларга Аллоҳ таолонинг чексиз раҳматлари нозил бўлади. Биз Унинг раҳматларини тасаввур ҳам қила олмаймиз.
Бу ойда шундай амаллар борки, уларни ҳар бир мусулмон билади ва бажаради ҳам. Масалан, бу ойда рўза тутиш фарз қилинган. Алҳамдулиллаҳ, мусулмонлар Аллоҳнинг тавфиқи ила рўза тутадилар. Яна, таровеҳ ўқийдилар, бу суннат амални жамоат бўлиб бажариш саодати мусулмонларга насиб бўлади. Лекин мен ҳозир бошқа бир жиҳатга эътиборингизни тортмоқчиман.
Одатда, муборак Рамазон ойида фақат рўза тутилади ва кечаси таровеҳ ўқилади, холос, бундан бошқа айри хусусияти йўқ, деб тушунилади. Тўғри, бу икки ибодат Рамазон ойининг энг катта ибодатларидан эканида шубҳа йўқ. Лекин фақат шунинг ўзигина эмас, балки, муборак Рамазон бундан ҳам кўпроқ нарсани талаб қилади. Қуръони каримда Аллоҳ таоло шундай дейди:
وَمَا خَلَقْتُ الْجِنَّ وَالْإِنسَ إِلَّا لِيَعْبُدُونِ
Яъни: “Жин ва инсонни фақат Менга ибодат қилишлари учунгина яратдим” (Зарият , 56).
Ушбу ояти каримада Аллоҳ таоло инсонни яратишдаги асосий мақсадини баён этди. У ҳам бўлса, инсон фақат Аллоҳга ибодат қилсин. Яъни, Аллоҳ жинлар ва инсонларни фақат бир иш учун яратдики, улар Ўзининггина ибодатини қилсинлар. Инсон ҳаётининг моҳияти, унинг дунёга келиши ва дунёда яшашининг асл мақсади шу – у фақат Раббига сиғинсин, тамом!
Алишер Муҳиддинов
“Ҳидоя” ўрта махсус ислом
таълим муассасаси ўқитувчиси
