O‘ZBEKISTONDA YOSHLAR UCHUN YARATILAYOTGAN SHAROITLAR
Bugungi kunda dunyoning ko‘plab mamlakatlarida yoshlar siyosati davlat rivojining muhim ustunlaridan biri sifatida qaralmoqda. Yurtimizda ham mustaqillik yillarida yoshlar masalasiga alohida e’tibor qaratilib kelinmoqda. Ayniqsa, so‘nggi yillarda O‘zbekiston Respublikasi Prezidenti rahbarligida yoshlar siyosati tubdan yangilanib, ularning hayotini har tomonlama qo‘llab-quvvatlash davlat siyosatining ustuvor yo‘nalishiga aylandi.
Har yili 30 iyun kuni mamlakatimizda "Yoshlar kuni" sifatida keng nishonlanadi. Bu sana nafaqat bayram, balki yoshlarning imkoniyatlarini ko‘rsatish, ularning orzu-intilishlarini ro‘yobga chiqarish va jamiyatda o‘z o‘rnini topishlariga keng yo‘l ochuvchi kun hamdir. Bugun yoshlar nafaqat O‘zbekiston kelajagi, balki uning hozirgi taraqqiyotining asosiy harakatlantiruvchi kuchiga aylangan.
Ta’lim va bilim olish imkoniyatlari
Yoshlarning sifatli ta’lim olishi uchun respublikamizda barcha zaruriy sharoitlar yaratilmoqda. So‘nggi yillarda yuzlab yangi maktablar, kollejlar, texnikumlar va oliy ta’lim muassasalari qurilib, ta’lim muhitini zamonaviylashtirishga katta sarmoya yo‘naltirilmoqda. Onlayn ta’lim platformalari, xorijiy oliygohlar filiallari va grant asosida o‘qish imkoniyatlari yoshlar uchun keng yo‘l ochmoqda. Prezident maktablari, ixtisoslashtirilgan bilim dargohlari va “Barkamol avlod” markazlari – bular barchasi yosh avlodning intellektual salohiyatini yuksaltirishga qaratilgan.
Ish bilan ta’minlash va tadbirkorlikni qo‘llab-quvvatlash
Yoshlarning ish bilan ta’minlanishi davlat e’tiboridagi eng muhim masalalardan biridir. "Yoshlar daftari" tizimi orqali har bir yoshning muammosi individual tartibda o‘rganilib, ularni hal qilish mexanizmlari ishlab chiqilgan. "Yoshlar bandligi dasturi" asosida yuz minglab yigit-qizlar mehnat bozoriga jalb qilinmoqda. Shuningdek, yosh tadbirkorlarni qo‘llab-quvvatlash, ularning biznes g‘oyalarini moliyalashtirish, subsidiya va imtiyozli kreditlar ajratish ishlari ham faol amalga oshirilmoqda.
Masalan, "Yoshlar – kelajagimiz" jamg‘armasi orqali ko‘plab yoshlar o‘z tadbirkorlik faoliyatini yo‘lga qo‘yishga muvaffaq bo‘lmoqda. Bu nafaqat ularning daromad topishini, balki yangi ish o‘rinlari yaratishini ham ta’minlayapti.
Madaniyat, sport va ijtimoiy hayot
Yoshlarning bo‘sh vaqtini mazmunli o‘tkazish, ularni sog‘lom turmush tarziga jalb qilish maqsadida yurtimizda madaniyat saroylari, sport majmualari, kutubxonalar va yoshlar markazlari faoliyati kengaytirilmoqda. Bugun har bir viloyatda, hatto eng chekka hududlarda ham yoshlar o‘z qiziqishlari bo‘yicha shug‘ullanishlari uchun imkoniyatlarga ega.
Sport bo‘yicha yutuqlarga nazar tashlaydigan bo‘lsak, xalqaro musobaqalarda qatnashayotgan yosh sportchilarimiz yurtimiz bayrog‘ini yuksaklarda hilpiratmoqda. Ular nafaqat sportda, balki ilm-fan, san’at, texnologiya va boshqa sohalarda ham xalqaro maydonda yurtimiz nomini tanitishmoqda.
Yoshlar uchun yaratilayotgan huquqiy asoslar
O‘zbekiston Respublikasida “Yoshlarga oid davlat siyosati to‘g‘risida”gi Qonun mavjud bo‘lib, u yoshlarga oid huquq va majburiyatlarni aniq belgilab beradi. Shuningdek, Yoshlar ishlari agentligi, Yoshlar ittifoqi va boshqa tashkilotlar orqali yoshlar davlat siyosatining to‘g‘ridan-to‘g‘ri ishtirokchisiga aylangan.
So‘nggi yillarda yoshlar parlamenti, yoshlar muammolarini ko‘rib chiqish bo‘yicha maxsus platformalar va onlayn murojaatlar tizimi faol yo‘lga qo‘yilgan. Bularning barchasi yosh avlodning davlat boshqaruvida faol ishtirok etishiga yo‘l ochmoqda.
Xulosa qilib aytganda, O‘zbekistonda yoshlar uchun yaratilayotgan sharoitlar tobora kengayib bormoqda. Bugungi yoshlar – ertangi kuchli O‘zbekistonning poydevori. Shuning uchun ham ularning orzularini ro‘yobga chiqarish, salohiyatini yuzaga chiqarish va har tomonlama qo‘llab-quvvatlash davlatimizning eng ustuvor maqsadlaridan biri bo‘lib qolmoqda.
30 iyun – Yoshlar kuni har bir yigit-qizga ishonch, g‘urur va mas’uliyat bag‘ishlaydigan muhim sana sifatida yuragimizda mustahkam o‘rin olmoqda. Bayram barchaga muborak!
