Saharlik fazilati

Alloh taoloning yolg'iz o'ziga munosib hamdu sanolar bo'lsin! U zotning rosuli va bandasi Muhammad (sollallohu alayhi vasallam)ga va u zotning suyukli ahli-baytiga va jonkuyar sahobalariga durud-u, salovotlar bo'lsin! 

Alloh taolo o’z kalomida ramazon oyining farzligini ochiq aytgan bo’lsa-da, hadisi qudsiyda ham bu oyning fazilati va ko’p yaxshiliklari haqida ochiq xabarlar bergan. 

Jumladan Rosululloh sollallohu alayhi vasallam ham o'z hadislarida bu oyning yaxshiliklari, xossatan saharlik haqida bir qancha ajoyib xabarlar berganlar. 

Quyidagilar ularning ba’zilaridir:

• Abdulloh ibn Horis roziyallohu anhu aytadilar: “Rasululloh sollallohu alayhi vasallamning huzurlariga kirganimda u zot sollallohu alayhi vasallam saharlik qilayotgan ekanlar. Shunda: “Albatta, saharlik barakadir”, dedilar” (Imom Nasoiy rivoyati).
• Abu Sa’id Xudriy roziyallohu anhudan rivoyat qilinadi. Rasululloh sollallohu alayhi vasallam: “Saharlik qilish – barakadir, bir qultum suv bilan bo‘lsa ham saharlik qiling”, dedilar (Imom Ahmad rivoyati).
• Salmon Forsiy roziyallohu anhudan rivoyat qilinadi. Rasululloh sollallohu alayhi vasallam: “Baraka jamoat va saharlikdadir”, dedilar (Imom Tabaroniy rivoyati)
• Saharlik qilish Nabiy alayhissalomning sunnatlaridandir.
• Zayd ibn Sobit roziyallohu anhu bunday deydi: “Nabiy sollallohu alayhi vasallam bilan birga saharlik qildim. So‘ngra u zot bomdod namoziga turdilar” (Imom Buxoriy rivoyati).
• Irboz ibn Sariya roziyallohu anhu aytadi: “Rasululloh sollallohu alayhi vasallam Ramazon oyida meni saharlikka chaqirib: “Baraka dasturxoni sari shoshilgin”, dedilar (Imom Abu Dovud, Imom Nasoiy rivoyati).
• Saharlik – Islom ummatini ahli kitobdan ajratib turuvchi amallardan biri hamdir.
• Bu haqda Amr ibn Oss roziyallohu anhudan rivoyat qilinadi. Rasululloh sollallohu alayhi vasallam: “Bizning ro‘zamiz bilan ahli kitobning ro‘zasi orasidagi farq saharlik qilishdadir”, dedilar (Imom Muslim rivoyati).
• Saharlik qilish fazilatlaridan yana biri unda duo qabul bo‘luvchi vaqt bor.
• Abu Hurayra roziyallohu anhudan rivoyat qilinadi. Rasululloh sollallohu alayhi vasallam: «Alloh taolo har kechaning oxirgi uchdan biri qolganda: “Kim Menga duo qiladiki, Men uni qabul qilsam, kim Mendan so‘raydiki, Men unga bersam, kim Menga istig‘for aytadi, Men uni mag‘firat qilsam”, deydi», dedilar (Imom Muslim rivoyati).
• Saharlik qilish Alloh va farishtalarning rahmatiga noil qiladi. Abu Sa’id Xudriy roziyallohu anhudan rivoyat qilinadi. Rasululloh sollallohu alayhi vasallam: “Saharlik qiluvchiga Alloh va farishtalarning rahmati bo‘ladi”, dedilar (Imom Ahmad rivoyati).
• Saharlikda xurmo iste’mol qilish Rasululloh sollallohu alayhi vasallamning sunnatlaridan hisoblanadi. Payg‘ambarimiz sollallohu alayhi vasallam: “Xurmo mo‘min uchun qandoq ham yaxshi saharlik”, deganlar (Imom Abu Dovud rivoyati).

Alloh taolo barchamizga ushbu ramazon oyini chinakam taqvodorlarga xos tarzda o’tkazishni va Payg‘ambarimiz sollallohu alayhi vasallamning sunnatlariga amal qilishni nasib etsin.

Muhammadiyev Muhammadsolih

"Hidoya" o'rta maxsus islom
bilim yurti o'qituvchisi